Evdən çıxmadan əmlak almaq imkanı – ELEKTRON HƏRRAC

Evdən çıxmadan əmlak almaq imkanı – ELEKTRON HƏRRACƏmlak Məsələləri Dövlət Komitəsinin (ƏMDK) təşkil etdiyi özəlləşdirmə hərraclarına investorlar və vətəndaşlar elektron şəkildə, yəni evdən və ya ofisdən çıxmadan da qoşula bilərlər.
Elektron hərrac vasitəsilə hərracda əmlak sahibi olmaq mümkündür.
Belə rahat şəraitdə növbəti hərrac 19 fevral tarixində keçiriləcək. Budəfəki özəlləşdirmə hərracında iştirak etmək istəyənlərin ümumilikdə 101 dövlət əmlakı üzrə seçim etmək imkanı var. Özəlləşdirməyə çıxarılan əmlaklar kateqoriyasına, sahəsinə, ilkin hərrac qiymətinə və aid olduğu iqtisadi sahələrə görə müxtəlifdir. Belə ki, dövlət əmlaklarından 64-ü kiçik dövlət müəssisə və obyekti, 17-si qeyri-yaşayış sahəsi, 20-si isə səhmdar cəmiyyətidir.
Bu dəfə hərraca mağazalar, restoranlar, yardımçı təsərrüfatlar, əmlak kompleksləri və digər obyektlər çıxarılıb. Obyektlərin ümumi faydalı sahəsi 20 kv.m ilə 3813 kv.m arasındadır. Sahibinə yüksək gəlir qazandıra biləcək əmlaklardan biri paytaxtın Mərdəkan qəsəbəsindəki restorandır. Onun ümumi faydalı sahəsi 1743.9 kv.m-dir.
Şəmkirdə yerləşən yun tədarükü məntəqəsinin ümumi faydalı sahəsi 3312 kv.m, torpaq sahəsi isə 63 min kv.m-ə yaxındır. Geniş torpaq sahəsi ilə birgə özəlləşdirməyə çıxarılması dövlət əmlakının iqtisadi potensialını artıran göstəricilərdən biridir.
Fərqli xidmət sahələri üzrə sahibkarlıq fəaliyyətinə başlamaq istəyənlər üçün uyğun imkanlar yaradan qeyri-yaşayış sahələrindən 5-i Sumqayıtda digərləri isə paytaxt rayonlarında yerləşir. Bu növ dövlət əmlaklarının ümumi faydalı sahəsi 14 kv.m və 1612 kv.m arasındadır. Ən yüksək ümumi faydalı sahəsi olan qeyri-yaşayış obyekti Yasamal rayonu, 613-cü məhəllə, M.Muxtarov küçəsindədir.
Dövlətə məxsus səhm paketlərinin hərraca çıxarıldığı səhmdar cəmiyyətləri quşçuluq, kəndkimya, nəqliyyat, inşaat, təmir və digər sahələrə aiddir. Belə əmlaklar sırasında "Azinterservis", "Sabirabad İnşaat Sənaye", "Kürdəmir Quşçuluq" kimi səhmdar cəmiyyətləri var. Qeyd edək ki, budəfəki hərracda investorlar paytaxtla yanaşı, respublikanın müxtəlif bölgələrində yerləşən səhmdar cəmiyyətlərinin 30%-45%-lik səhm paketlərini özəlləşdirə bilər.
Dövlət əmlakları haqqında ətraflı məlumat əldə etmək və özəlləşdirilmə hərraclarına qoşulmaq istəyən şəxslər komitənin rəsmi saytına (emdk.gov.az) və Özəlləşdirmə portalına (privatization.az) daxil ola bilər.

Mənbə: İnsider.az


Tarix: 9 Array 2019

Daşımaz əmlak xəbərləri